الشهيد الطبيب البيطري زاهر ناجح النقار

الشهيد الطبيب البيطري زاهر ناجح النقار
اسم الوالدة: هالة

09/12/2011 - 16/11/1987

حماة | حي طريق حلب | العمر 25 عاماً

أصيب برصاص الأمن عندما فتحوا النار على المتظاهرين الخارجين من مسجد مصطفى جابر في حي طريق حلب

كان زاهر يعمل في السعودية، لكنّ رحيل صديقه الشهيد عصام رقية, حرّك الدماء بداخله، وأبت نفسه المقام بعيداً عن رائحة الجنان.. دفعه فقدان رفيق دربه إلى العودة لحماة، مقسماً أن يحررها من دنس الطغاة الذين تجبروا وحسبوا أنهم بقتلهم الأحرار يحرمونهم الحياة وما دروا أن بحماة شباب يشترون الموت لتوهب لهم الحياة! ما دروا أن هناك شباب لا يهابون الموت بل يتسابقون للشهادة ويتنافسون عليها.

وبمسجد مصطفى جابر بحي طريق حلب يرتفع صوت زاهر صادحاً بالتكبير وتختلط معه أصوات الأحرار، ليقودهم نحو أصداء الحرية.
من أصعب الصراعات هي تلك التي يخير بها الشاب بين طريق الشهادة والحرية وبين قلق الأهل واصرارهم على العودة، وقد عاناه زاهر وصمد طويلاً أمام أهله يخبرهم بقوة باختياره بالمتابعة والعزم على طريق الشهادة والحرية.. لكنهم يأبون إلا الاصرار عليه بالرحيل!! ذلك الحكم الذي أباه زاهر وأسره بقلبه مستخيراً الله أن يختار له الخيرة من أمره، فلو أجبره العالم على أمر لم يكتبه الله له لن يتمكنون! وهو قد أودع رجائه عند الله وحده..
اختار اهله له السفر وعزموا الأمر لذلك، وحجز يوم السبت 10/12/2011, لكن الله اختار له سفراً يليق به أكثر، اختاره للشهادة، ليحتضن رصاصات غادرة استقبلته فور خروجه من صلاة الجمعة 9/12/2011. وغادر زاهر عالمنا متأثراً بجراحه ، ليلتحق بعصام وصحبه الأحبة الذين سبقوه.
تمنى الشهادة ونالها . ونفذت وصيته التي كانت بأن يُلف جثمانه الطاهر بعلم الاستقلال السوري.

قصة حياته مكتوبة على لسانه بطريقة عاطفية:

من يومين اجا لعنا ع الجنة شهداء جدد .. وخبروني أنكن مساويين حملة عم تحكو علينا .. حبيت احكيلكن شوي عن حالي ::

اسمي زاهر نقار ..مواليدي 16 – 11 – 1987 أبوي ناجح وامي هالة .. عندي 3 أخوة شباب واختين بنات , ابوي موظف بسيط وحالتنا المادية عادية .. وتاريخ استشهادي 9 – 12 – 2011 ( جمعة اضراب الكرامة )

أنا طبيب بيطري .. بس لمعلوماتكن ما بقي شغلة ما اشتغلتا .. اشتغلت بالبناء , بالطباعة , عتالة , بعت سوس , رسيبشن بفندق , مسؤول حملات عمرة , موزع جرايد , اشتغلت بالحلويات , صحفي وكتبت عن حماة كتير شغلات ..,

عفكرة .. أنا مجسد الوحدة الوطنية بحماة .. أنا من السوق .. نفوسي دار الغنم ( جورة حوا ) بس ساكن بالحاضر بطريق حلب ..

بحب الكولا و هواياتي التصوير, وبحب النواعير كتير ... حتى فكرت ساوي جمعية لأصدقاء النواعير .. بس ما خلوني :(

عفكرة .. كنت موقع عقد وناقصني توقيع ع جواز السفر .. ورب العالمين يسرلي تأشيرة ع الجنة رأسن ..

لما بلشتو الثورة كنت بالسعودية .. خلصت عقدي وجيت ع حماة , بالبداية ما كنت استجر انزل مظاهرات .. كنت خيفان تكون رياء .. وأول جمعة نزلتا كانت ( أطفال الحرية ) بوقتا وصلت ع جسر العبيسي ولما صار الضرب صرت اسحب جثث لعند المجمع الطبي ..

من يومين جاري معي هون بالجنة .. الشهيد عصام رقية عم يذكرني لما كل واحد فينا كان يذكر صفات البنت يلي بفكر يرتبط فيها .. كانت مطالبي عالية كتير .. وكانو يقولولي :: هالبنت ما بتلاقيها غير بالجنة ..
تقولو كان قلبن حاسن .. سبحان الذي خلق هالحوريات ما أحلاهن

يلا .. ما بدي طول عليكن .. بس حبيت سلم عليكن بمناسبة مرور 6 شهور على استشهادي ..

وأمانة إذا حدا شاف امي أو أبوي يسلملي عليهن كتير .. لأنن بكونو اشتاقولي

د. زاهر النقار

في ذكرى 100 يوم لاستشهاد الدكتور زاهر النقار, نقلاً عن صديق له:

كنت ع طول حس انو زاهر أحسن مني , ما بعرف ليش .. سبحان الله .. عرفت الحقيقة بعد ما استشهد ..

كنا عم نساوي جوازاتنا سوا ... جوازي كان ناقصو ورقة من التجنيد ..
و جوازو كان نائصو تأشيرة من رب العالمين ..
التأشيرة رصاصة من أكتر شخص بكرهو وما بعرفو ,

يلي ما بيعرف زاهر ..

زاهر أطيب قلب عرفتو بالدنيا .. من أكتر الأشخاص يلي اذا عندن معاناة بيكتمو هالشي بقلبن و بيظهر الابتسامة ..
ونحن بالمقبرة بدنا ندفنو .. صارو يشيلو التابوت ويرقصو فيه وهنن عم يصيحو : زين زين .. مكحول العين .. والعاذلة .. والله علييييه .. " قدام امو وابو .. الله يعينن .. انحرق قلبن عليه ..

كان ع طول يلي مواصفات المرة يلي بيحلم انو يتجوزا .. كنت جاوبو .. هالمواصفات ما بتلاقيها إلا بالجنة ..

كان يحب جامع مصطفى جابر لدرجة التعصب .. سبحان الله .. استشهد بشهر الله الحرام .. بيوم جمعة .. بقلب الجامع يلي بحبو ..

أبوه قبل ما يطلع ع الجامع ع صلاة الجمعة قلو : وين رايح ؟؟ وين بوسة الحمام ؟؟ رجع من ع الباب باس راس ابوه وايدو ونزل ع الجامع ..

بحب قول لشخص قلي انو سوريا أغلا من زاهر .. فشرت .. سوريا ما بتسوى من دون زاهر وأمثاله .

زاهر .. مشان الله تسامحني .. أنا مقصر بحقك كتير .. الله يقدرني ردلك جمايلك.

منقول عن   Ahmad Ovi

يازاهر مارح ننساك

نيالك يام الشهيد

♫♪ ♫♪ ♫♪ ♫♪ ♫♪

عم تبكي أم الشهيد
عم تبكي ابنا الوحيد
دموعا خلتني ابكي
دموعا بتنزل بالتغريد

من فرحا بكيت امو
بتتمنى لحظة تضمو
كتبت عالصورة اسمو
قدام العالم شهيد

ربيتك كل شبر بندر
حتى بكرا افرح فيك
شو بعمل بايد الغدر
بيكفيني انك شهيد

نيالك يام الشهيد
تتهني والسعد يزيد
نيالك هوي بالجنة
بالجنة عايش سعيد

ابنك بيتو بالجنة
استشهد ليدافع عني
نيالك والله وتتهني
نيالك يا ام الشهيد

نيالو حقق طلبو
معروف بحسنو وادبو
بالعالي اسمو كتبو
والله عن دربو ما بحيد

ابنا استشهد نيالا
بتمنى امي بدالا
حتى غني كرمالا
نيالك يام الشهيد

جثمان الشهيد

http://www.youtube.com/watch?v=WfTnjGHdfm8 

برومو الشهيد زاهر النقار

http://www.youtube.com/watch?v=48znbsMt_Iw

حماه | صوران | أربعاء الشهيد زاهر النقار | 14/12/2011
مظاهرة لحرائر المدينة 

 http://www.youtube.com/watch?v=r5V7mZ9mXRY